Feuerwehr Eisolzried

Rückblick auf 10 Jahre Webseite

Thu, 04 Dec 2025 00:00:00 +0100

In oam Jahrzehnt bassiert vui Zeig. In da Arbad, privat und in da digitalen Woid. Seit über zehn Joor gibts www.feuerwehr-eisolzried.de scho. Oa Grund, an Blick in de Vergangenheit zum werfa und weida nach vorn zum schaun.

2015 homma de Idee wieder aufleem lassn, für unsa Feiawea a Webseitn zum macha. Über den geistigen Vorgänger homma bereits wos gschriem. Mit dem CMS Jooma homma eha weniga Erfoig ghabt, desweng a kompletta Neibau von Grund auf. So is im Laufe der Zeid a große Webseitn mit vui Kategorien entstanna.

A bei da Feiawea soibst, im echtn Leem, passierd vui. De Floßfahrt auf da Isar war legendär, a neis Fahrzeug homma eigweihd und natürlich des Gründungsfest für 125 Joor FFw Eisolzried heia.

Noch Corona is mit de neia Beiträg aweng staad worn. A Webseitn für an Verein lebt vo aktivem Ratsch und mitanand arban. Des funktioniert langfristig nur, wenn die Aufgabn auf mehra Leid verteilt san. Soibe Bock drauf hom und motiviert sei für neis Zeig san weitere wichtige Sachan.

Niamois de Zuversicht verliern und weida solidarisch füreinander so sei, a in a Zeid, wo vui am Zahnfleisch daher kemma. Dann gibts des Projekt a weitere 25 Joor.

Hilfe bei Umzug

Mon, 01 Nov 2021 00:00:00 +0100

Mid 12 Mann ham mia am 06.11.21 den Umzug in de neie Katastrophenschutzhalle in Hebertshausen untastützt.

Zusammen mid de Kameraden aus Pellheim und Pasenbach stand für uns Sandsackauffülln aufm Programm. Um für den Erstangriff bei am Hochwasser präpariert zum sei, homma 30 Palletten Sandsäck fürs KAT-Lager befüllt.

Training in Schutzanzügen

Mon, 04 Oct 2021 00:00:00 +0200

Um für an Ernstfall gewappnet zum sei, stand zur Oktoberübung praktischer Umgang mit Chemikalien-Schutzanzüg aufm Plan.

Weil ma beim Arban erschwerte Bedingungen ausgsetzt is und der Einsatz ned zum Tagesgeschäft ghert, is es um so wichtiger dass ma regelmäßig trainiert.

Desmoi homa wia bei da Leistungsprüfung an Löschaufbau gmacht und Saugschleich kuppelt. Schwaare Kommunikation, a eingeschränktes Sichtfeld und körperliche Belastung zoin zu de Beeinträchtigungen.

Zeitreise

Thu, 09 Sep 2021 00:00:00 +0200

De Webseits is scho über 6 Joor oid. De mehra wissn ned, dass davor scho a andere gehm hod, de jedoch nia “gscheid”, oiso über a Domain online war.

Heid is genau 18 Joor her ois de erste Fassung der Webseitn vo Eilzria über an temporärn Webspace im Netz war.

Mia homs archiviert und ihr kennt sas do oschaun. Vui Spaß bei der Zeitreise!

Autounfoi an Kreizung

Sun, 02 May 2021 00:00:00 +0200

Am 2. Mai 2021 war am Noochmittog gega 15.30 Uhr a Verkehrsunfoi an der Hauptkreizung in Deinhausn wo mia higruafa worn san. A Fahrerin hod de Vorfahrt missachtet.

Beim Zusammenstoß san zum Glück beide nur leicht verletzt worn.

De auslaufenden Betriebstoffe homma gebunden und de Autos geborgen.

Zusätzlich bei dem einstündigen Einsatz warn no Rettungsdienst, Bolizei und as THW do.

Brand oana Photovoltaikanlag

Sat, 10 Apr 2021 00:00:00 +0200

Da nächste Einsatz vo heia war am 10. Aprui wo ma um 10. Uhr alarmierd worn san.

A Photovoltaikanlag vo am Baustoff- und Agrarhandel in Lauterbo hod Feia gfanga. Zusamma mit de Ortsfeierwehrla war de Situation noch ungefähr oana Stund im Griff.

Der KFV Dachau schreibt mehra.

Böschungsbrand im Lus

Wed, 24 Feb 2021 00:00:00 +0100

Am 24. Februar 2021 samma vo da Leitstelle für an Brand bei Bergkircha-Lus gega 14 Uhr alarmiert worn.

Es hod si nausgstoid, dass a Fläche vo circa 100qm² trockens Groos brennt hod. Mia hom Wassa aus dem Lusgrom in da Nähe ghoid und as Feia in na hoibn Stund glöscht.

Unterstützt samma von der FF Lauterbo worn.

Grill schuid für Flächenbrand

Fri, 24 Apr 2020 00:00:00 +0200

Am Freitag, 24. April 2020 gega 11.30 Uhr hods a Alarmierung für an Brand in de ehemaligen Schrebergärten bei Bergkirchen Lus gehm. Beteiligt warn de Feiawean vo Bergkircha, Eilzria, Lauterbo, Suizemoos und Wiednzhausen.

Zeitgleich zum Schnoiangriff mit Wasser ausm Fahrzeugtank is a Wasservorgung ausm nahegelegenen Graben hergstoid worn. Der Flächenbrand vo circa 300m² is damit erfolgreich glöscht worn. De Einsatzkärfte hom an benutzten Grill gfunna, der wos woi schuid am Brand is.

Noch 1,5 Stunden war da Einsatz beendet.

Fit an da Motorsaag

Sat, 19 Oct 2019 00:00:00 +0200

Vom 15.10.2019 bis 19.10.2019 war in Indersdorf a Ausbildung an da Motorsaag. Zusammen mit andere Feuerwehrla ausm Landkreis warn vo uns Michael Mayr, Markus Reischl und Andreas Straucher dabei.

In da Theorie ging es um:

Aufbau, Funktion und Instandhaltung
Schutzkleidung/-ausrüstung
Gefahren
Schnitttechniken (Trennschnitte, Fällheberschnitt, Schneiden vo Hoiz unter Spannung)

Danoch samma ind Praxis überganga und hom g’übt.

Veranstaltet is worn von da Kreisbrandinspektion, de schreibt ausführlicher hier.

Mia übn im Woid dahoam

Mon, 01 Jul 2019 00:00:00 +0200

Zua Übung im hoaßn Juli homma uns vorgstoid, dass a Woid brennd.

Um mehra Wassa dabei zum hom, homma zwoa Güllefassl voi gmacht. Unser gloana 600l Tank, den mia dabei ham, dad ned lang glanga. Mid zwoa Bulldog samma oiso nauf zua Pumpstation im Deinhauser Woid.

Gelegenheit macht Übung

Sat, 19 Jan 2019 00:00:00 +0100

Der zwoate Teil der Übung im Januar war wieder beim Haus beim Schwarz Bäda wia beim erstn Teil.

Nomoi samma mit Schnoiangriff vorganga und im verrachten Haus is unter Atemschutz a vermisste Person aufgfunna worn.

As weda war desmoi wesentlich bessa.

Schnä schaufen im Oberland

Tue, 15 Jan 2019 00:00:00 +0100

Nachdem es in de letztn Wochan so stark gschneid hod warn a Feiaweala vo da Feiawea Eilzria südlich vo Minga im Einsatz, um Heisa vom Schnä zum befrein.

Treffpunkt war um 6e in Kreizhoizhausn um in Dacha nach einer kurzn Besprechung in Kolonne weida noch Miesbo zum fahrn. Erster Einsatzort war a oids Zollhaisl in Bayrisch Zell bei dem ma as Dooch vom Schnee obgrammt hom. Unsane Kameraden vor Ort waren Florian Lunglmeyr, Sebastian Rastinger, Tobias Riedl und Andreas Straucher, de home de notwendige Ausbildung zur Absturzsicherung.

Zum Mittog hods Linsensuppe vom Rotn Kreiz gehm. Danoch gings zum nächstn Haus, a Wohnhaus, weida. Gega 5e war Feieromd und olle fleißigen Leid san no mit Wurschtsemmeln ausgstattet worn.

Bei dem Großeinsatz warn ausm Landkreis Dachau alloa ungefähr 100 Feiawealeid und no Leid vom THW dabei.

Mehra zu dem Thema hod de Presse gschriem:

Spaß am Übn obwoi s'koid is

Sat, 05 Jan 2019 00:00:00 +0100

Zua Übung im Januar is zum oiden Haus beim Schwarz Bäda ganga, wos weggrissn wern soi. Sau koid wars und mir ham mehrare Sachan gmacht:

Mitm Schnoiangriff soit ma an Brand in da Küch im ersten Stoock mitm C-Rohr löschn. Danoch hamma no a Kleinlöschgerät und an Schaumfeialöscha ausprobiert.

Beim letzten Teil soitn mehrare Trupps unter Atemschutz a verlorn gangane Person im verrachten Haus suacha und rettn.

Wachsmaschin brennt

Tue, 04 Sep 2018 00:00:00 +0200

Großeinsatz in Deinhausn! De Maschin vom Imkerloon “Dachauer Bienenwelt” wo as Wachs herstoid hod am Dienstog gega 8e in da Fria as brenna ogfrangt weil de Technik gspunna hod.

Nachdem olle Feiawean okemma san, homs den Brandherd mit Atemschutz schnoi unter Kontrolle griagt. Wega de Buidl vo de Wärmebildkameras ko ma davo ausgeh, dass koa Gefahr mehr do is. Drum war nooch zwoa Stund der Einsatz beendet.

Da KFV, Merkur, Süddeitsche und de Lauterbacha schreim aweng mehra.

Dreifach übn hebt bessa

Mon, 07 May 2018 00:00:00 +0200

Bei scheena Weda samma an drei verschiedane Ort zur Übung im Mai ganga:

z’erscht zum Blootz bei da Rose
dann zum Schwarzbäda in da Hochfeldstraß
hint Naus no zum Brunnaweg in da Nahad vom Spuiblootz

Wir ham uns vorgstoid, dass bei am jädn a Auto in da Garaasch brennt. Neba da Wassaentnahme ausm Unterflurhydrantn homma d’Straß obgsichert, Schlachbrückn aufbaud und mid oan bis zwoa C-Schleich nochm Verteila den Brand freile glöscht.

In da Praxis lernt ma as Handwerk

Sat, 14 Apr 2018 00:00:00 +0200

Fürn Praxisteil der Truppmannausbildung hom si heia 26 Anwärter am Feiaweahaisl in Foigading droffa, um gemeinsam zum übn. Vo da Feiawea Eilzria warns sechse und drei Oide de wos ghoifa hom.

Bei schneena Weda is vormittogs losganga mid am erstn Teil vo dera “modularen” Ausbildung, de wos über a hoibads Joor regelmäßig stattfindt. De Neia hom beim Saugschlachkupp’en vo de Oidn no wos lerna kenna, wias gäd.

Nochdem olle zam Mittog gmacht hom, is weider ganga mim zwoatn Teil: Wasser ausm Unterflurhydrantn raus hoin. Am End is no kurz wos vazoid worn, wos guad und wos vielleicht ned so guad war.

Cool Water Grill Challenge

Wed, 14 Feb 2018 00:00:00 +0100

Merci nomoi an de Feiawea Schwabmühlhausen für de Nominierung!

Damits wissts um wos gäd, schauts am bestn einfach des Video o :)

Kartfahrn im Kartpalast

Fri, 05 Jan 2018 00:00:00 +0100

Obwois sauba gschiffd hod gings auf de gräßte Elektro Kartbahn wo ma drinnad fahrn koon: an Kartpalast im GADA Bergkircha.

Noochdem d’Reifen guadn Grip bekomma hom, is glei mit da Qualifizierung los ganga. De vordern Plätz warn hoaß umkämpft und so is nahad recht spannend worn fürs eigentliche Rennen.

Nooch 16 Rundn wo da Turbo zennt worn is, san am End drei Leid aufm Podest gstanna, de wos gwunna hom. Daweil hom die andan no besprocha wia ma beim nächstn Moi besser fahrn koon.

Große Übung an Biogasanlag

Tue, 14 Nov 2017 00:00:00 +0100

Bei da jährlichn Gmoaübung ging es heuer zur Biogasanlag in Bergkircha. Wia oiwei warn vui Feiawean aus da ganzen Gmoa mit dabei bei dera Einsatzübung.

Es is ognomma worn, dass a Feia mit vui Raach in am Gebäude gibt, des durch a Leck zum brenna ogfangt hod. Außerdem san zwoa Leid in dem Gebiet vermisst. Da Kreisfeiawehrverband schreibt no mehra darüber.

D’Feiawea Eilzria hod as Feia mitm Schnellangriff glöscht, as Liacht aufbaud und de andern mit da Wasserversorgung ghoifa.

Vo Eilzria warn dabei:

Schäds (Gruppnführa)
Woife
Reischl
Riale
Schuasta
Zolli

Sturmschoon auf Kreisstraß

Sun, 29 Oct 2017 00:00:00 +0200

An dem Wochaend wars Sturmtief Herwart in ganz Mitteleuropa aktiv. A im Landkreis Dacha is wos bassierd. An Haufa Feiawean hom ausrucka miaßn, um aufzumramma. Da Kreisfeuerwehrverband hod a wos davo gschriem.

In da Fria gega 8.30 Uhr is im Einsatzbereich vo da Feiawea Eilzria a umgfoina Baam auf da Kreisstraß Eilzria nooch Priel gmoid worn. Z’erscht is d’Straß obgesperrt worn, damit ma sauba arban koon. Dann homma an Baam zamgschnien und mim Bulldog weggfahrn.

Mia warn ungefähr 30 Minuten und mit 15 Leid im Einsatz.

Am Eilzriada Sä schäbads oft

Tue, 04 Jul 2017 00:00:00 +0200

Heid da fria umara 6.45 Uhr isd Feiawea Eilzria alamiad worn. A komplette Mannschaft is nahad zum Eilzriada Sä ausgruckt, weils do an Unfoi vo zwoa Autos gehm hod. Mitanand hod ma dann Matrial zamgrammt wos aus de Karrn ausglaffa is und d’Straß obgsichad.

Des ganze hod ungefea 75 Minutn dauad und dann san olle de wos ghoifa hom wieder zruck in eanare Feiaweahaisl gfahrn.

Große Übung an da Moasa

Mon, 03 Jul 2017 00:00:00 +0200

As Weda war supa ois mia im Juli an da Moasa in Eilzria g’übt hom, dass a Määdrescha auf da Wiesn brennd.

Z’erscht homma midm Schnoiangriff as Wassa ausm Tank vom Feiaweafahrzeig gnomma. Dann hod de gloane Pumpm ausm oiden Feiaweahaisl dafüa gsorgt, dass ma a Wassa mit de Saugleitunga durchd Pumpm vom Fahrzeig noch vorn bringa. An Lüfta homma a hergnomma und gschaud, ob a stabil lafft.

Hint naus homma no a Wassa ausm Unterflurhydranten gnomma, der wos glei ums Eck war. Dabei is freile z’erscht d’Straß zum Eilzriada Sää gscheid obgsichad worn. Dann homman Hydrantn sauba gspült und an Tank vom MLF wieder voi gmacht.

Wos langsam aba sicha dunkel worn is, hod si zoagt, dass des Teliskopliacht aufm Dooch vom Fahrzeig recht guad is, damit mia bei da Arbad wos seng.

Gemeindeübung in Eilzria

Mon, 26 Jun 2017 00:00:00 +0200

Heid am Omd ab 19 Uhr war de jährliche Übung vo olle Feiawean da Gmoa in Eilzria.

Desmoi is drum ganga, dass a Stool brennt und a boor Leid vamisst san. D’Feiawea Eilzria hod ogschafft, weils ja vo do san. Nachdem kurz vazoid worn is wos Sache is, hom a boor ogfanga mit Saugschleich a Wassa aus da Moasa zum hoid. Dazua a no a Wasser aus de Unterflurhydranten vo da naah. Damit d’Autos weidafahrn kenna, is a Bereich vo da Straß mid Hiadl und Liachta obgsperrt worn. A Schlauchbrückn üba da Kreisstraß war a notwendig, um as Wasser zum Verteiler zum bringa, damit de Angrifftrupps wos doa kenna und d’Autos durchfahrn kenna. In dera Zeid hom si a boor Leid mit Atemschutz ausgrüst und hom nooch de vamissten Personen gschaud.

Nachdem ois bassd hod, war a kurze Besprechung mim Woife vo da Inschpektion z’Dacha wo ma gsogd hod wos guad war und wo ma nächsts moi mehra drauf schaun soit.

Wieda a Unfoi am Eilzriada Sä

Sun, 11 Jun 2017 00:00:00 +0200

D’Feierwea Eilzria is gega 14 Uhr alamierd worn: auf da Vabindungsstraß vo Eilzria zum Eilzriada Sä hods gschäbad, dabei war a Motorradlfahrer beteiligt. Ois d’Feiawea hikemma san, homs festgstoid, dass zum Glück eam ned vui bassierd is. De Feierweala hom ghoifa, Öl des wos ausglaffa is weg do und freile an Vakea gregelt.

Da ganze Einsatz hod ungefea a Stund dauad und vo Eilzria warn acht Leid dabei.

Füraschein vo da Feiawea gmacht

Fri, 28 Oct 2016 00:00:00 +0200

Im Oktoba hom da Brummer Beda, da Lungl Flo und da Schönwetter Hiase an Feiaweafüraschein gmacht. Jetz derfas unsa neis mittlas Löschfahrzeig fahrn.

De Ausbildung homs intern gmacht und a jäda hod seks Fahstund ghabt. Sie hom oa stund mit am Fahlehra vo da BePo Daha umanand fahrn miaßn umd Prüfung zum schaffa.

Schwara Vakeasunfoi beim Eilzriada Sä

Mon, 24 Oct 2016 00:00:00 +0200

Gestan hods bei am Motoradltreffn am Eilzriada Sä an schwara Unfoi gehm. D’Feiawea Eilzria hod s Straß obgsperrt.

As THW hod do mehra gschriem.

Unfall auf da Kreisstraß

Sun, 23 Oct 2016 00:00:00 +0200

Mia san in da Fria um 5e alarmiert worn weil jemand im PKW eigschlossn is.

Nochdem mia am Feiaweahaisl okemma san, hod de Leitstoi gmoant, de Person hod si soiba befrein kenna. Drum hom mir nimma ausrucka miaßn.

Mitanand üben im GADA

Mon, 17 Oct 2016 00:00:00 +0200

Im GADA is a Übung mit de Feiawean vo da Gmoa Bergkircha gwehn.

Mia soitn Wassa vo de Saugstoin der Löschwassabrunna in de zwoa Logicparks fördern. D’Feiawea Foigading und de Kreisbrandinspektion homs organisiert.

Übung für Maschinistn am Woidberg

Wed, 12 Oct 2016 00:00:00 +0200

Am Woidberg is a außerordentliche Übung gwehn wo ma Wassa a boor Metta nauf transportiert hom.

Dabei hamma im Brunnenweg as Wassa vo am Unterflurhydrantn ghoid und mit B-Schleich d’Woidstraß nauf gleitet. Dabei war de oide Pumpm vo friaras und de neie Interne vom Fahrzeig im Einsatz. Vo olle Leid warn simme Maschinistn.

Ausbildung am Feialöschgeräd in Laudabo

Mon, 10 Oct 2016 00:00:00 +0200

Im Oktoba war ma bei da Feiawea Laudabo zum übn. Zwoa Stund lang homma mitanand den neia Feialöscha “Hydrofix” ausprobiert.

Übn aufm Woiznfoid

Mon, 01 Aug 2016 00:00:00 +0200

Den Monat hamma unsare Übung auf am Woiznfoid ghabt des wos scho obg’ernt war.

As Szenario da Übung war, dass a Bulldog oda wos andas auf dem Foid brennt hod. Mir ham as Leicht- und Mittelschaumrohr im Einsatz g’habt.

Fehlalam im Logicpark

Thu, 21 Jul 2016 00:00:00 +0200

A Brandmelder hod im GADA Logicpark ausglöst und hod a boor Feiawean alamierd. Nachdem mia festgstoid hom, dass a Fehlalam war, war da Einsatz beendet.

Wassa aufbaud und aweng Theorie im Juli

Tue, 05 Jul 2016 00:00:00 +0200

Im Juli homma mim neia Fahrzeig am Wendehamma vo da Birknstraß g’übt. D’Straß homma obgspead und dann Wassa vom Untaflurhydrantn zua Bumpm aufbaud. Mid de C-Schleich homma d’Wiesn aweng noooß gmacht.

Wo ma zruck kemma san, homma d’Schleich aufghängd und nachad is vazoid worn wia ma mim Rettungskoffa umgähd.

An ganzn Dog übn bei da Feiaweaschui Geretsria

Mon, 04 Jul 2016 00:00:00 +0200

Mit de Feiaweala vo Foigading und Günding samma am Samstog, 25. Juni 2016 zua Feiaweaschui nohch Geretsria gfahrn. Mir warn sechse, davo zwoa Gruppnführa, zwoa Maschinistn und fünfe de wo Atemschutz hom.

An dem Dog homma mehrare Sachan g’übt: z’erscht is a Brand vo a Wohnung simuliert worn wobei a oa Person g’feit hod. De Eilzriada hom übanoma, Foigading hod mit eanam HLF 40/1 g’hoifa.

Danoch war Foidgading dro und mir ham mit Atemschutz bei am Mehrfamilienhaus g’hoifa, des wo brennd hod. Mehrara Leid warn a vermisst. G’raacht hods wiad Sau und de Leid mim Atemschutz hom g’suacht und mit Lüfter entraacht.

A jäds Szenario homs danohch mit de Ausbilder besprocha. De Gruppn is a oiwei duachgschmischt worn. De Ausbilder hom a vazoid wia ma si am besten mit de Fahrzeig aufstoid, wenn ma am Einsatz o’kimmt.

Hint naus homma olle mitandand a Großübung gmacht: a Werkstod mid Laga hod brennd wobei si da Raach üban Aufzug überoi verbreit hod. A Einsatzleita hod o’gschafft und de drei Feiawean oa Aufgab gehm: oane fürs Wasser, de andan hom mitm Atemschutz as Gebäude durchsuacht und a wieda entraacht.

Am End hom de Ausbilda vazoid wos guad und wos ned so guad war. G’lobt san a olle Feiawean worn. De Leid wos dabei warn hod der ganze Dog gfoin.

Brand vo a Steckdosn im GADA

Fri, 01 Jul 2016 00:00:00 +0200

Mia san alamierd worn weils ghoaßn hod: Brand an da OMV Tankstoi im GADA.

Es hod si schnoi zoagt, dass a Steckdosn in am Lagaraum brennd hod. Mia hom nimma vui doa miaßn.

A Fahrzeigweih is nia vakehrt

Wed, 15 Jun 2016 00:00:00 +0200

Am Sonntog, 05. Juni 2016, hom si d’Leid am Feiawea Haus vo de Eilzriada droffa. Mid Blechmusi und de Fahna samma nachad zua Kircha z’Deinhausn. Nohch da Kircha samma wiada naus und da Pfarrer Hack hod as Fahrzeig g’segnet und g’weiht.

Gloa Fonse hod de Gäste begrüßt und gmoant, des ganze war a riesen Sach fürd Zukunft. Außerdem hodda merce g’sogt bei da Gmoa fürs Fahrzeig (MLF). Da Simon moant, dass heidzudog d’Feiawea oiwei mehra zum leistn hom. Desweng muaß ma do investiern. D’Leid vo da Kreisbrandinschpektion, da Paul und da Woife, seng as Fahrzeig ois guade Sach damid junge Feiawehrla dazua kemma.

Danoch samma olle zruck zum Bürgahaus, wos nahad a boor Hoibe und an Schweinsbron mit Knedl für olle gehm hod; top bedient vo de Deinhauser Madln. Am End hods no an Kaffee und Kuacha vo de Frauna vom Ort gehn. Grod guad wars!

Mir song vagoids Gohd bei olle de wo bei dem Festl g’hoifa hom.

D’Presse hod a an glaona Bericht gschriem.

Eig'lohn seids zua Fahrzeigweih

Mon, 30 May 2016 00:00:00 +0200

Oiso, mir machan am Sonntog, 05. Juni, a Fahrzeigweih.

Olle Leid vo Deinhausn und Eilzria san eiglohn. Wennst nohchschaun wuist, wos ma an dem Dog macha, schaugst do.

Neis Fahrzeig obg'hoid

Sat, 23 Apr 2016 00:00:00 +0200

Mir hom am Freitog, 22 April unser neis Fahrzeig vo Lentna aus Hohenlindn g’hoid.

Es is a mittlas Löschfahrzeig (MLF) auf am MAN-Gstoi und ersetzt unser oids Tragkraftspritznfahrzeig (TSF). Greßa und moderna is hoid, aber hod no a boor guade Sachan. In da Kabina kenna sie zwoa Feiaweala an Atemschutz naufschnoin. Da Tank hod Blohz für 600 Litta. Do konnst schnoi amoi aweng a Wassa naushaun ohne dassd erst a Wassa vo extern aufbaun muaßt. In da Nohcht gibts a LED-Liacht vo am Mastn, den wo ma nauffahrn kohn.

Am Feiaweaheisl hom si vui Feiawea as Fahrzeig og’schaud und danohch no a Hoibe drunga.

G’feiad werd bei da Fahrzeigweih am 05. Juni.

THL übn mit da Feiawea Foigading

Thu, 21 Apr 2016 00:00:00 +0200

Im Aprui samma zum übn naus zum Feiaweahaisl Foigading.

Noch da gemeinsama Leistungsprüfung THL mit de Foigadinger letzts Johr, homma in dem Monat a Personenrettung aus am Fahrzeig mit hydraulischem Rettungswerkzeig g’übt.

A in Zukunft deng ma bei Einsätze mit andere Gmoafeiawean zam arban, weil mim neia Fahrzeig vo Eilzria mia an gräßan Einsatzradius hom. Oiso san Übunga mitananand b’sonders bei THL sau wichtig.

Ausbildung zum Ersthoifa Feiawea

Wed, 02 Mar 2016 00:00:00 +0100

Am 23. Januar 2016 is bei da Feiawea Karlsfoid de erschte Ausbildung in dem Johr zum Ersthoifa Feiawea g’wehn.

Nohch vui Theorie homma mit praktische Beischspui de Erstversorgung vo valetzte und eigene Leid wenn wos bassierd g’übt.

Vo Eilzria war da Hörmann Miche und da Felix Schmid dabei.

Obseiln im Feiaweahaisl

Mon, 15 Feb 2016 00:00:00 +0100

Im Februa war Absturzsicherung aufm Plan.

Unsre fünf erprobten “Spezialisten” vo da Absturzsicherung hom dessmoi in drei Stund olle de wichtige Ausrüstung zoagt.

Zruck schaun auf a Johr wo vui bassierd is

Thu, 28 Jan 2016 00:00:00 +0100

Am 22.01.16 war de Jahreshauptvasammlung vo da Feiawea Eilzria beim Hubert in Eilzria.

2015 is vui bassierd mit an Haufa Einsätze, Übunga und andere Sachan. Drum war da Jahresbericht vom Thomas recht lang. Da neie Vorstand Bernhard hod d’Mannschaft g’lobt und hofft, dass 2016 so weida gähd. Vui junge Leid san zum Feiaweala ernannt worn, de oitan san g’ehrt worn weils so lang dabei san.

Da Merkur hod an langa Artikl vo da Vasammlung online.

Neba dem Foto vo da Presse san no andere g’macht worn. A Gaudi wars!

Schwara Vakeasunfoi auf da Landstraß

Sun, 03 Jan 2016 00:00:00 +0100

Am 22.12.2015 hods g’schäbad auf da Landstraß zwischn Eilzria und am GADA wos nohch Boisweiß gähd. Foigading is umara 16:30 alamierd worn und hod si mit am THW und Maltäsa um de Leid wos beteiligd warn kümmad. Eana is zum Glück ned vui bassierd. Da Vakea is freile a obg’sichad worn.

13 Feiaweala warn für 1,5 Stund dabei.

Gloabrand g'löscht

Mon, 07 Dec 2015 00:00:00 +0100

Heid noochmittog gega 15:30 Uhr san de Feiawean vo Eilzria und Laudabo alamiad worn, weil an am gloana Woid bei da Verbindungstraß Eilzria und Eilzriada Sä Raach gmoid worn is.

O’zends Reisig war fast auf de Baam danebn übergriffa. Mim Schnoiogriff homma den Brandherd glei unter Kontrolle brocht.

Mia warn mit 9 Feiaweala a hoibe Stund im Einsatz.

Wenn die staade Zeit vorbei is

Sun, 06 Dec 2015 00:00:00 +0100

… werd’s wieda ruhiga. Mit dem Zitat vo Karl Valentin hod da dritte Brügamoasta Robert Axtner gestan sei Rede beim Hubert in Eilzria beendet.

Wia jäds Joor hom de Vetrana vo Deinhausn und de Feiawea Eilzria olle Mitglieda, Freind und Bekannte zua Weihnochtsfeia eiglon. Nochm Omdessn war da besinnliche Teil mit Weihnochtsmettn vo da Bachana Stubnmusi und kurze, boarische G’schichtn zum Advent vorg’lesn vo da Zenta Steiner.

Da neie Vorstand Bernhard Schmidbauer hod si bei olle bedankt de wo den Omd (und davor) mitg’hoifa hom und eröffnet de Christbaumversteigerung.

De Vasteigara Schorsch und Hexa hom an Haufa gespendete Preise mit vui Gaudi und Witz on de Leid brocht. Danooch samma no griabig zam g’hockt und hom de ersteigerten Schmankerl glei moi probierd.

Rääunfoi bei Pria

Mon, 30 Nov 2015 00:00:00 +0100

In da Nocht vo 19. auf 20. Novemba 2015 hods an Vakeasunfoi auf da Kreisstraß DAH5 zwischn Eilzria und Pria gehm.

As Fahrzeig is in a Rää neibrennt und is vo da Straß obkemma. Dabei hod si da Fahra leicht valetzt. D’Feiawea Eilzria, Bolizei, Sanka und THW hom si umd Person kümmad, d’Fahrbahn obgsperrd und danooch sauba g’macht.

Feiawea Eilzria war mid 12 Leid vo 23:45 Uhr bis 1:30 im Einsatz.

Leistungsprüfung Wassa g'schaffd

Wed, 25 Nov 2015 00:00:00 +0100

Im Frühjahr homma d’Leistungsprüfung Wassa mit Erfoig obg’legt.

Gruppenführer	Maschinist	Melder	Angriffstrupp	Wassertrupp	Schlauchtrupp
Andreas Straucher	Matthias Schönwetter	Michael Brummer	Peter Brummer	Martin Kreitmeier	Tobias Riedl
			Melanie Thies	Markus Heigl	Thomas Gürster

Sondasignalfahrt Training

Tue, 03 Nov 2015 00:00:00 +0100

Am Montog, 02.11.2015 war im Feiaweahaisl Karlsfoid vo 13 bis 17 Uhr a Sondasignalfahrt Training.

Nooch da Theorie überd Einsatzfahrt is danooch am Fahrsimulator a Fahrtraining g’übt worn.

Zwoa Feiawealeid vo da Feiawea Eilzria warn dabei.

Leistungsprüfung THL erfolgreich

Thu, 29 Oct 2015 00:00:00 +0100

Mit de Foigadinger Feiawea hom de Eilzriada heia wieda a THL-Leistungsprüfung mit Erfoig obg’legt.

Es is suppa g’arbad worn und de Schiris Ernst Zethner, Rainer Zollbrecht und Franz Brüdler hom nur gloana Sachan kritisiert. Robert Axter hod si bei da Gmoa fürd Einsatzbereitschaft bedankt und de Mannschaft zum Essn beim Hubert danooch eig’loon.

Vo Eilzria hom Markus Asam, Johann Funk, Florian Lunglmeyr, Andreas Hörmann, Michael Hörmann, Thomas Hörmann und Markus Reischl teilg’nomma.

(Des is a Zusammenfassung vo am Artikel im Regionalteil der Printausgabe der Dachauer Nachrichten)

Neie Maschinisten

Thu, 15 Oct 2015 00:00:00 +0200

Bei da Feiawea Altomünsta war vom 28.09. bis 10.10.2015 wieda a Ausbildung zum “Maschinist für Tragkraftspritzen und Löschfahrzeuge” vo da Kreisbrandinspektion Dacha. Bei da praktischen Abschlussübung homs Wassa vo da Glonn g’nomma und über 1000 Metta lang g’fördert. Zwoa Feiaweala vo Eilzria warn dabei.

Da Kreisfeiaweavaband hod in am Artikel vui darüba g’schriem.

Neua Atemschutzträga

Fri, 02 Oct 2015 00:00:00 +0200

Vo 07.09.2015 bis 19.09.2015 war a Ausbildung vo Atemschutzträga mit da Kreisbrandinspektion Dacha.

Oa Feiaweala vo Eilzria war dabei und hods g’schaffd.

Da Kreisfeuerwehrverband hod do bisserl wos g’schriem.

Fahrzeig auf Abwegen

Thu, 10 Sep 2015 00:00:00 +0200

Am Donnastog, 7. Mai 2015 is d’Feiawea Eilzria um 19 Uhr vo da Leitstelle FFB zu am PKW auf Abwegen alamierd worn.

Da Fahra hod ned aufbassd und is vom Foidweg obkemma und in am Grom neikemma, so dass a as Fahrzeig nimma naus kriagt hod. Da Fahra hod d’Leitstelle alamierd und es war ned sicha ob a Benzin oder Öl verlorn ganga is, drum is Eilzria alamierd worn.

Noochdem mir do warn, homma as Fahrzeig ausm Grom g’schoom. Es is koa Umweltschaden festg’stoid worn.

Wassaentnahme ausm Fluß

Wed, 09 Sep 2015 00:00:00 +0200

Bei da Übung im Septemba am 07.09.2015 war Wassaentnahma as da Moasa aufm Plan.

Noochdem da Gruppnführa wos vazoid hod, homma Saugschleich kuppelt, Vakeasabsicherung g’macht und a Liacht aufbaud und an Löschaufbau zur “Brandstelle” g’macht.

Motorradlunfoi bei Bergkircha-Lus

Mon, 07 Sep 2015 00:00:00 +0200

A junga Motorradlfahra is am 06.09.15 auf da Valängerung der Zweigstraß bei Bergkircha-Lus zum Eilzriada See vo da Fahrbahn obkemma und hod si meamois aufm Foid übaschlong. Warums genau bassierd is, woaß ma no ned.

Es hod si zoagt noochdem da Sanka, BRK, Bolizei, THW und Feiawea Eilzria okemma san, dass a a Dusel g’habt und si nur leicht valetzt hod.

D’Feiawea Eilzria hod an Vakea obg’sichad und bei da Patientenrettung g’hoifa.

Lange Ölspua zum Eilzriada Sä

Wed, 12 Aug 2015 00:00:00 +0200

Am 08.08.15 kurz vor 14 Uhr is d’Feiawea Eilzria alamierd worn, weil a Ölspua auf da Straß zwischn Eilzria und Eilzriada Sä g’seng worn is. Untastützt samma vom THW Dacha und de Foigadinger worn, um de ca. 2km lange Ölspur mit Ölbinda zu binden und danooch weck zum doa. D’Feiawea Eilzria war mit 13 Leid vor Ort, da Einsatz hod insgesamt ungefähr 2 Stund dauad.

Sandsäck fülln im Bauhof Dacha

Fri, 10 Jul 2015 00:00:00 +0200

Am 07.07.15, 19 Uhr war a Übung im Stadtbahnhof Dacha. Des ganze is vom Landratsamt und da Kreisbrandinspektion organisierd worn.

Ma hod mit da Dispogruppn “Sandsackfüllen” mit vui andere Feiawean ausm Landkreis und am THW Dacha a neis Förderbandl mit Sandtrichter g’übt. Dabei homma mea ois 500 Sandsäck g’scheid aufg’fuid.

Leck in LKW-Tank

Fri, 10 Jul 2015 00:00:00 +0200

Am 07.07.15 gega 9 Uhr hods am Schlooß in Eilzria a Malheur gehm, ois beim Aufloon auf an LKW da Tank valetzt worn is. Desweng hods mearae Litta Disel nausdruckt. As THW Dacha und d’Feiawea Eilzria san alarmierd worn und hom den Riss provisorisch ob’dicht. Danooch is da Rest vom Kraftstoff obpumbt worn und des wos ausglaffa is is mit Ölbinda beseitigt worn. Mia warn mit 6 Leid für a Stünderl im Einsatz.

Übung mit da Steckloata und Wassaaufbau

Thu, 09 Jul 2015 00:00:00 +0200

06.07.15: Z’erscht homma mit da Steckloata a potentielle Katznrettung vo am Dooch g’übt. Danooch Wassa komplett aufbaud vo am Untaflurhyrantn.

Floßfahrt auf da Isar

Mon, 15 Jun 2015 00:00:00 +0200

In da Fria am 13. Juni 2015 samma mit 2 Busse nooch Woifratshausn, um a Floßfahrt auf da Isar zum macha. As Wedda war stabil und mir hom uns auf an scheena Dog g’freid. Ois ma okemma san no schnoi aufs Glo und as Proviant auf as 7x18m große Floß naufg’loon. Leinen los!

Da Wiggal mid seina Band spuid sauba oan auf und glei hommas erschte Fassl Bier o’zapft. De 2 Flößa hom uns guad durch de erschten Stromschnoin durchbrocht. Zeid für a Brotzeid: an Lebakaas mit Kartoffesalod hods gehm; zum Obeschwoam glei an Original Angermeier Obstla hint nooch! Bekannte Voiksliadl homma gsunga, do ders Deinhausa Liadl natürli ned foin. A Fetzn Gaudi :D Vorm Mittog kimma a d’Sonna naus und de erschten hupfa as Wassa nei, um si friisch zum macha. Ma vazoid, manche hom a unfreiwillig während da Floßfahrt bood…

Nooch am kurzen Stop in am Biagartn samma weidag’fahrn. Es hod oiwei gnua zum Essn gehm, a koide Hoibe und a Gaudi hods ned langweilig wern lassn. Schod dass nahad scho vorbei war und mir hom in Minga/Thalkircha o’glegt. Unsa Busfahra hod uns nooch Deinhausn zruck brocht und vui Leid san no beim Grillfestl am Bürgahaus an ganzn Omd bliem.

Fazit: es war a griabiga Dog mit scheene Momente, fetzn Gaudi und vui Action. De Highlights warn de 3 langa Wassarutschn und de gloane Aloisius Kabine zum Wassa lassn hintn am Floß :)

Übung Absturzsicharung und Löschaufbau

Wed, 03 Jun 2015 00:00:00 +0200

01.06.15: Auf am Hof homma Absturzsicharung mit Selbstrettung g’macht. Danooch no a Löschaufbau.

Obspean fürs Fernsehn

Fri, 22 May 2015 00:00:00 +0200

Am Dienstog, 19.05.15 wars Fernsehn in Deinhausn do fürn TV-Krimi “Monaco 110”. Mir hom d’Kreisstraß zwischn Bergkircha und Eilzria und de Straß nooch Deinhausn obg’spead. An 3 unterschiedliche Positiona hod Eilzria an Vakea mit 5 Leid für 6 Stund g’regelt. Koordinierd homma uns mit 2m-Band Funkgeräde. Ois obbaud worn is is a LKW vo de Filmleid im Grom hänga bliem und vo uns mit am Bulldoog nauszong worn.

Neuwahlen bei der Hauptversammlung

Mon, 06 Apr 2015 00:00:00 +0200

Da Merkur hod im Lokalteil vo unsara Jahreshauptversammlung vom 27.03.15 wos g’schriem. Nebam Jahresbericht, Ehrunga und allgemeina Ausspracha hods a Neuwahlen gehm.

An komplettn Zeitungsartikel findst Du do.

Sturmeinsatz im Brunnenweg

Thu, 02 Apr 2015 00:00:00 +0200

31.03.15 - Sturmtief “Niklas”

2 Einsätz hods an dem Dog gehm, oi zwoa im Brunnenweg in Deinhausn:

Z’erscht samma alarmierd worn, weils a Dooch vo a Halle obdeckt hod. As Bleech is aufs Gartnhaisl und am Pool vom Nachbarn gfoin. Mir homs g’sichad und zalegt. Einsatz hod 1,5 Stund dauad mit 7 Leid.